Vo St. Gallä uf Züri und from Los Angeles to San Diego

Am Mittwoch 7.10. 09 hani mich mit em Michi am 6si uf de weg zum Flughafe gmacht und bi döt go itschegge. Nocher simer uf Züri und döt am HB as Oktoberfescht go Znacht esse und es paar Bierli go neh. (mis erschti Mass i mim Lebe) Nocher no witer uf eis zwei Caipis. Gsurft hani am Dom sin Couch und han fascht verpennt am 5fi. bi denn aber zum Glück mit em Taxi doch no pünktlich am Flughafe gsi. Nochemne stündige Flug bini denn in Düsseldorf acho, woni öppe füf Stund umeghanget bin.
De Flug uf Los Angeles hani mit döse, esse und Spanish lerne guet über d Rundi brocht.
De Gholam, min Nochpur vo San Gallä het mich denn am Flughafe abgholt und mir sind zu sinere Schwöster hai. Döt hani denn bis am Samschtig ünernachtet. Die erschte 2 Täg simer am Pool ghängt und hend es feins BBQ gha. Sus giz hald nu Iranisches esse, was aber au sehr guet isch. Viel rohi Zwieble und immer frischi Frücht. No junk food so far!!

Was chli schad isch, dassi hald nöd s viel englisch ghöre und nume farsi, das heisst chde chde tschöderi...
Am Samschtig het mich den de Alex abgholt und mir sind zäme anes Couchsurfing meeting. Es Oktoberfescht im Hamtington, oder so was. 15 Dollar Itritt und jedes Bier het 10 Dollar koscht. Echte Wucher!!! Defür het e dütschi Bänd gspielt und es isch mir echt chli vorcho wie in Münche. Aber hammer wie die Amis abgange sind.
Jo und will ebe das Bier sooo türr gsi isch hani en guete Grund gha sum chli umeflirte und mir es Bier zahle loh.
Irgenwen so am eis bini denn doch recht müed gsi und mir sind denn hai. Statt en Kebab hets natürlich en Brurrito geh. mmhhh isch das lecker gsi.

S' erschti mol bim Alex gsurft, er isch jo scho mehreri Nächt bi mir gsi, simer denn am nöchte morge wieder richtig Westwood. Uf em Weg döt hane hemr no en Spaziergang am Venice Beach gmacht, wo sehr unterhaltsam gsi isch, mit all denne komische Gstalte. Es isch zerscht mega heiss gsi und nocher hez immer meh agfange winde. Nocher simer no an Santa Monica Beach, wo denn aber no chüehler gsi isch und ich nur no hai han wölle go penne.

Ui jo und am Mentig morge woni ufgstande bin, hani mega gschwollni Auge und s ganzi Gsicht volle Püggeli gha. Ha zerscht gmeint es sigi e Sunneallergie, aber das hani jo no nie gha und wo sich denn de Usschlag uf em ganze Körper agfange het verteile hani gmerkt, dasses was anders muess si.
So blödi Impftablette wo mir de Arzt in San Gallä geh het, weg em Esse in Südamerika. Mannnn wenni das gwüsst het dassi nocher usgseh wie nocher Botoxbehadlig heti de Seich nöd gnoh.
Janu jetzt laufi hald no es paar Täg mit me gliftete Face umenand. Und weiss wenigschtens wie sich das afühle würd!

Am Nomitag sind de Gholam und ich richtig San Diego gfahre, will er do will en alte Kumpel bsueche. Jetzt simer do und realaxed im Garte oder gönd go shoppe!

Morn mached mir üs uf de Weg noch Palm Spring womer es paar Täg imne Spa Hotel verbringed und eifach nu d Sunne gnüssed und d Mineral Bäder. Viellicht isch das jo denn gad guet für mini uströchneti Huut.