Buenos Aires

So entlich bini wieder mol online und han de Ziit tum en Blog zschriebe. In California, gnau gsait Newport Beach, isch eifach immer was los gsi. Bi nie dezuecho. und vorallem sit de Winterziit umstellig sind die Taeg eifach viel zchurz gsi und ich han moeglichst viel ad Sunne woelle. Sobalds denn dunkel worde isch hemer znacht koched und sind id Bar fuer eis, zwei Bierli und es paar Billardgames. Es isch hammer gsi. Es chlises Staetli, wo jede enand kennt. Ha mich so richtig wohl gfuehlt.
Doch leider sind den au die rechtlich 4 Wuche vergange und ich han min rucksack wieder muesse packe. Aber voher hets natuerlich no e Abschiedsparty geh. Mit Roesti, Schwiizer Berge, Chaesschnittae, und Schwizer Chili.
Es sind viel neui Fruende cho aber au Couchsurfers. Einigi sind sogar vo LA obe abe cho. Was mich aber am meischte gfreut het, isch dass de Taylor, en Couchsurfer, vo vor 2 Johr mit mir in Jonschwil am Openair gsi isch, cho isch. Er isch naemli de Grund gsi,wiso ich ueberhaupt in Newport Beach glandet bin.

Noch dere Strenge Abschiedsparty isch denn au scho Thanksgiving gsi, de Tag vom Danke Saegae und Alkohol trinke. Das heisst i bin am Morge am achti, mit me chline Kater ufgstande und ha Smirnoeffli zum zmorge gha. Mir isch sofort besser gange. Doch de morge isch chli langsam gsi. Chille uf em Sitzplatz und chli suenele. Denn hemer ues uf de Weg gmacht zu uesem Thanksgiving- Gastgeber.
Es het en fritierte Truthahn geh mit oepe 6 Bilage. Eifach hammer gsi. Viel Alkohol isch gflosse und ich han mich richtig amuesiert zum dene bsoffen Wiber zuezluege. Han chli gfilmet und gfoetelet.
Am Fritig bini amne Hochzitapero gsi, vomne Paar vo in Vegas ghuerote het und noch de Flitterwuche glich nochli mit de Fruende het woelle fire.
Und denn isches leider scho Samschtig gsi und ich han mich muesse verabschiede :-) Isch scho recht trurig gside ganz Obig, aber min Host het uf FB es meeting gfunde, am Steand vo LA, nu es paar minute vom Flughafe.
Es sind alti Highschool fruende vo au vo Kansas uf California zueglet sind. Er hets scho ueber 20 Johr nueme gseh und so heter gad nomol en Grund gha zum mich an Flughafe ztue. Es isch recht gmuetlich gsi und fuer mich es gedieges Abschiedneh. Bier, Smirnoff, heissi Schoggi und Marshmellowsandwich.

Als Rauchchnebeli und mit Sand i de Schueh und de Hosestoes bini den go itschecke und ab uf "oh wie schoen isch Panama"
Doch fuer mich als Raucher isch Panama noed so schoen gsi. Noch 7Stunde Fug hani noed mol choenae eis rauche, will ich noed us em Flughafe han choene. Janu, bi den ca nomol 7 Stunde gfloge und den entlich in Buenos Aires acho. D Andrea, mini aller erschti Couchsurferi, het mich am Flughafe abgholt.
Es isch en riese Kulturshock gsi fuer mich. Vom ruhige NPB mitme 30Sekunde Weg and Strand, i di grossi, luti und staubigi Stadt. Zerscht hani mir gwuenscht ich choenti wieder zruckfluege. Aber dass hani den au noed woelle. Und so bini jetzt sit em Suntigobig do und gspant was so alles uf mich zuechunt.
Han also scho en 3.5 stuendige Stadtspaziergan hinder mir, aber han no lang noed alles gseh.

Sorry fuer mis komische Tuetsch aber bin jetzt au no am spanish lerne und es isch au scho halbi 3 i de Nacht!

Wirde denn wieder Brichte!
E ganz e schoeni Adventsziit an alli!